بقلم : د.شكري الهزَّيل ... 20.09.2012

اللافتات تملآ المكان المتمكن مكانه منذ قرون والزمان بقي متزمن زمانه منذ الازل والاجيال ماتت بعد ان توالدت وتكاثرت وخلفت وراءها صورة الصوره وصورة الاب والابن والحفيد والحفيده في تسلسل سلالي تجلى في ملامح ومقاطع الوجوه التي حملت مواجع الوطن السليب عبر الاجيال من كتف الى كتف ومن قلب الى قلب ومن وجدان الى وجدان ... ما اشبه البارحه باليوم او اليوم بالبارحه وما اشبه القرن الغابر بالقرن الحاضر حين كان جدي يحمل نفس اللافته اللذي حملها ابي فيما بعد وها انا احملها وبجانبي حفيد ابي يتهيأ لحملها حين يحين دوره في دورات الاجيال..سقطت..تسقط..لم تسقط..سقط..عاشت..لم تعش..ماتت.. لم تمُت..نستنكر .. نشجب.. نموت ولن نركع...ياجبل ما هزك ريح.. اقعد واستريح ولا تداري الريح... لا تنحني للعاصفه.. انت ليست مجرد سنبلة قمح تحصدها ماكنه لابل انت ايضا ليست مجرد حبة قمح سقطت صدفه ونبتت صدفه من جديد في هذه الارض.. انت انتي وانتم بذور الوطن وقمحه وطحينه وملحه وتاريخه.. انتم ليست مجرد لقمة عيش ولا شربة ماء ولا معيار ومقدار دينار شارد في ربوع الوطن الحاضر الغائب...غيبوبة وطن..سهوة وطن..سكرة وطن..صحوة وطن.. اين الفَّكره بعد السكره!..مغمور يخاطب مخمور..اصحى يا صاحي.. قوم من النوم..سرقوا هويتك..سرقوا اسمك..سرقوا بيتك..سرقوا عيشَّك وإعتقلوا ابنك متسللا وتائها في سهول الوطن .. متسللا يقص اثر وطنه وهو يراه بالعين المجرده.. يراه من اعالي الجبال ومن فساحة السهول وطول وعرض السواحل وعبر الحدود...يراه من عمق الصحراء يتصحر ولا يتصحَّر.. بين التصحر والتصحر تربض فلسفة التصحير والتطيير..تصحير العقول وتطيير الوطن من ايادي الى ايادي..ايادي عن ايادي تفرق.ايادي غاصبه..ايادي طاهره.. ايادي اثمه وعقول قاصره قصَّرت ايادينا حتى لا نطال الوطن ولا يطالنا..قصير قد يكون زمن السقوط, لكن زمن النهوض اطوَّل.. اطول مما تصورنا وابعد من مسافة هروبنا من واقعنا وحتى ولو هربنا الى بلاد الهند والسند.. الهروب الهارب من وطن رابض على كف راتب.. وراتب رابض على صدر وطن..يسقط.. سقطت.. لم تسقط.. لافتة تحمل شعار..تسقط اتفاقية باريس.. وأُمها..اوسلو.. وكمان..يسقط الساقطون الذين اسقطونا في حفرة اوسلو .. قبر اوسلو.. قبر معلوم وليست مجهول الهويه والحسب والنسب..حسب ونسب ممتد الجذور من ساحات البيت الابيض وحتى ساحات وباحات المقاطعه..المقاطعه.. وما ادراكم بالمقاطعه..فاعله مفعوله ومشلوله وبكماء وصماء الى حين يحين موعد الراتب.. وينُو.. تأخر..مُتنا من الجوع..وينو.. ليش مادفعوا..مين؟.. المانحين وفاعلين الخير!..لٍيك شو هالوطن المُعتقل والسجين وعايش على مزاج المانحين..يوم بيدعمُوه ودوم بينسوه.. ليش هيك؟..ياريت ما يدعموه حتى ندعم انفسنا..ما يدعموه دوم حتى تصحى القوم من النوم..نوم وصحوة كنعان بن كنعان الكنعاني..ليش هيك!!
ليش..ببساطه لانو الوطن ضايع صايع بين الاحتلال وبين خُريفة الدوله والمانحين... والممنوحين مكبلين بسلاسل شروط القبضه اخر الشهر.. القاء حجر على الاحتلال..معناه ..فش قبضَّه..اعتراض على مستوطنه..فش راتب..قفز من فوق الحاجز..ما فيش راتب وزيادة اعتقال ..القدس خط احمر..اي اعتراض على مواطنين جُدد..خذ بالك ممنوع تقول مستوطنين.. وممنوع تقول كمان عاصمتنا... شوف واصمت..كل واسكت..اي كلمه طالعه نازله حول هوية القدس..معناها: ما فيش قبضه ولا راتب ولا حتى صلاه في القدس.. هيك الدنيا واحوالها..يا بترضى يا بدُق راسك بالجدار العازل واذا مش عاجبك لف ودور على الحواجز ورقص حواجبك كمان!..ليك شوف هذا ال اوباما وصاحبو عاملين من القدس قضيه.. قضيه امريكيه.. واحد بيقول عاصمه و الثاني بيقول: لا مش عاصمه وبس!.. ابديه كمان كل مافي انتخابات امريكيه!.. نحن طبعا مش هامنا الامر ولا القضيه والمهم الراتب والماهيه!..القدس..لا .. هادي[ بالذال او الدال] ما بتطعم اهلها خبز بس بتجيب اصوات للرئاسه الامريكيه حتى تبقى عاصمه ابديه للجماعه..انتم عارفينها اكيد..ممنوع نحكي.. لحَد يسمعنا ويطير الراتب وماكو ماهيه..ماكو قضيه يُساوي ماهيه.. قضيه..ماكو راتب وماهيه.. اكو سلطه ماكو وطن واذا مش مصدق روح على رام الله وشوف او تفرَّج عليها من بعيد واذا مش مقتنع غَّرب من رام الله الى غزه!..طبعا بس مع تصريح..ماكو تصريح يعني ماكو تغريبه ولا تشريقه لا حتى نفس..حصار..جدار.. والقاب..اخر خبر كان : الرئيس حرد وزعل من الغلاء الفاحش وسافر على الهند يشم الهوا... هواء هندي...نحن ماعندنا الله وكيلكم لا هوا ولا طاقة للهوا[هواء]..مخنوقين..يادوب بنتحرك.. ويادوب بنتنفس.. وبناكل وبنشرب بصعوبه... الخير كل الخير بارضنا وصَّحنا..مسموح لكل الناس تمٍد اياديها الى الصحن وتنهل رزقها.. ما عدانا..ماعدى اهله..صحن ينضح بما فيه لغير اهله..كل شئ عنَّا وما عنا شئ.. كيف بصير هالشئ؟..شُو هالمنطق اذا باقي اصلا في الدنيا منطق.. منطق ما عنا في كل المناطق..بعد عتبة الدار بشبر واحد بتصير غريب الدار وغريب البلاد.. ما بتعود لدارك الا بالف تصريح والف عذاب.. كل شئ بتصريح..داخل الجدار وخارج الجدار..النفس بتصريح.. زراعة الارض بتصريح..زيارة الاهل بتصريح..العمل ان وجد بتصريح.. شعب كامل عايش على التصريح والتأشيرة..تأشيرة بقاء وحق مكوث في وطنك.. مش مواطن؟.. انت ماكث مكوث مؤقت الى حين يأتي مواطن جديد..مستوطن!.. ويأخذ مكانك بطابو الالفين عام..خُريفه.. خرافه.. حدوثه..سموها ما تشاءوا..بس هذا حاصل عنا وواقع يومي!.. والامر بيتطور اكثر واكثر وصاروا الجماعه بدهُم يسكَّروا ويخمروا بمساجدنا وضح النهار...هُم من زمان بيسكَّروا وبيعربدوا بمساجدنا..بس في الليل!..مش في النهار!...اساع صار الامر اشكَّره ومهرجانات خمر ونبيذ ضاقت فيها كل الدنيا وما لاقَّت غير مسجدنا...سبحان الله... البعض بيقول قلة عقل وقلة حيا ويامسجد ما هزك ريح..لا..هذه عربده ما وراءها عربده..مش خريفه الامر!... واقع...ليك وماعليك وروينا القصه على طول وعرض الكره الارضيه..انتصرنا قبل الاوان!َ..لا لم ننتصر..صار المهرجان بالمسجد حسب البرنامج ونحن صوَّرنا الحدث ووزعناه على الوكالات.. وخُذ بيانات.. وشجب ونواح.. واحد عاقل قال:: خلَّص اللي صار صار والجماعه شربت نبيذها وروحوا والمهرجان خلَص..خيرها بغيرها...الله بعين؟!!
الخريفه طويله ومتفرعه, لكن مصبها وصبابها واحد..يا عالم حرام ..ياهُو..جرَّفوا قبر جدي وابوي..حرام عليهم..ياريت بس عطونا عظامهم ..لا .. اللي صار صار..على قبر ابوك وجدَّك فيَّ اليوم مقهى وناس بتقهقه قهقهة النصر والعهر!..خُريفة وطن..شو حكاية المقهى والوطن.. الوطن لمَّن يصير مقهى والمقهى لما يمحى اثار وطن.. وطن كا زينو..كا زينو وطن..قمار في وسط النهار..طاولة قمار..كل يوم بنخسر رهان وبيظَّل الكوشان معنا..هلموا بجماهيركم..شاهدونا ونحن الان نراهن حتى على اوراق الكوشان..طابو عنا وماعنا!..الله يسامحهم العثمانيين ما عطونا طابُو..ظلمونا واستغلونا وجهلونا وسلموها للإنجليز بردا وسلام وهاذول الانجليز ما قصَّروا.. كذبوا الكذبه مع الجماعه وصدقوها..طابو الفين عام وزياده...قبل التاريخ والتأريخ..طبعا القضيه خريفه..بس صارت واقع.. ابقوا معنا الله يخليكم مع هالشطحه والتغريبه.. خريفه..!!!
دورات ازمان تطارد ازمان واخرى تدور علينا...ياداره دوري بينا.. ظلي دوري بينا ..تا ينسوا أساميهم ..وننسى أسامينا ..لا ادري كيف سكبت بالحبر كلمات هذه الاغنيه بعد ان نسيتها لسنين طويله ولا ادري ان كانت تناسب النص في المعنى والفحوى والازمان تدور فينا وتطحن اسامينا وعظام اجدادنا لتصنع اسماء مكان اخر في زمان اخر اقل ما يقال فيه انه زمن مشبوه تشوبه عيوب كثيره.. العيب فينا ام في ازماننا.."نعيب زماننا و العيب فينا و ما لزماننا عيب سوانا و نهجو ذا الزمان بغير ذنب و لو نطق الزمان لنا هجانا"[الشافعي]... هنا وهناك..حيث تكاثرت الغربان ولبَّدت سماء وارض الوطن بالنعيق و بالخنوع والركوع...يتسولون بشعب كامل..يتسكعون عبر الزمن بما تبقى لهم من زمن تجاوزه الزمن...يتسولون.. يتوسلون يولولون...وطن بلا قافيه..وطن بشعب وبلا شعب..كل هذا الشعب وهذا التاريخ وهذه الازمان المعبقه بالتاريخ والمكان وما زلنا نتسول تأشيرة مكوث في وطننا؟.. تصريح مرور..تصريح عبور الجدار وبضعة امتار الى الدار..دارنا تحتاج الى تصريح دخول...دخول مسجدنا وكنيستنا يحتاج الى تصريح.. زمن مقلوب.. منطق مقلوب.. وما زال من بيننا من يؤمن بأكاذيب الاخر اكثر من واقع وصدق شعبه.. دورات الازمان والمنطق المقلوب..هذا هو الواقع الذي نعيشه في الوطن السليب.. الوطن المنسي..الوطن الحاضر الغائب..نعيش ولا نعيش وكي لا ننسى ...عاش الوطن عامرا باهله عبر الازمان.. وسيبقى.. نحن في محطة انتظار عجلة الزمن..باقون وليس ماكثون عابرون.. !!